సిరిసిల్ల : అర్ధరాత్రి ఇళ్లలోకి దూరుతున్న కొండచిలువల! శ్రీనగర్ కాలనీలో నిద్రలేని రాత్రులు

సిరిసిల్ల ముచ్చట్లు, రాజన్న సిరిసిల్ల:రాజన్న సిరిసిల్ల జిల్లా కేంద్రంలోని శ్రీనగర్ కాలనీలో ప్రస్తుతం కొండచిలువల భయం నెలకొంది. గత కొద్ది రోజులుగా కాలనీ పరిసరాల్లో సంచరిస్తున్న కొండచిలువలు, ఇప్పుడు ఏకంగా రోడ్లపైనే కాకుండా నేరుగా ఇళ్లలోకి చొరబడుతుండటంతో కాలనీవాసులు తీవ్ర భయాందోళనకు గురవుతున్నారు.

స్థానికులు తెలిపిన వివరాల ప్రకారం, రాత్రి వేళల్లో వంట గదుల్లోకి, పెరట్లోకి, పడక గదుల్లోకి సైతం కొండచిలువలు వస్తున్నాయని, దీంతో పిల్లలు, మహిళలు తీవ్ర ఆందోళన చెందుతున్నారని ఆవేదన వ్యక్తం చేస్తున్నారు. పిల్లలను బయటకు పంపాలంటేనే భయమేస్తోందని వాపోతున్నారు.

ఇప్పటికైనా అటవీ శాఖ అధికారులు వెంటనే స్పందించి, కాలనీలో సంచరిస్తున్న కొండచిలువలను పట్టుకుని అటవీ ప్రాంతంలోకి తరలించి, తమకు రక్షణ కల్పించాలని శ్రీనగర్ కాలనీవాసులు వేడుకుంటున్నారు.